林茂生ê故事

Home
林茂生ê故事

林茂生ê故事

開創台灣白話文學ê世界級教育家林茂生教授

林茂生教授(1887~1947)是台灣本土頭一个教育家，伊ê學問超過中國ê胡適，是當時台灣第一人。林茂生tī 1908年就用白話字書寫伊tī日本留學ê見聞記〈日本消息〉，比胡適ê 〈文學改良芻議〉早9冬，比魯迅ê白話小說〈狂人日記〉早10冬！
林茂生對日本東京帝國大學(chit-má ê東京大學)文學士kap美國哥倫比亞大學哲學博士畢業。林茂生以《日本統治下台灣的學校教育：其發展及有關文化之歷史分析與探討》ê博士論文，chiâⁿ做台灣第一位關心教育議題koh提tio̍h博士學位ê台灣人。林茂生教授一生熱心奉獻tī教育ê工課，前後tī長榮中學、台南師範學院、台南商業專門學校、台南高等工業學校、成功大學(koh擔任頭任圖館館館長10冬) hām 台灣大學等教冊，受伊牽教ê學子生put-lí-á chē。林茂生thèng-hó講是台灣thâu-kioh ê首席教育家。林茂生教授m̄-nā精通日文、英文、德文等外文，林茂生伊本身mā精通台語白話字，koh支持kap實踐台灣語文ê現代化、標準化hām建構以台灣母語做基礎ê「台灣學」教育。伊tī《臺灣教會公報》kō͘台語白話字寫〈新台灣話陳列館〉專欄。可惜，chiah-nī優秀ê教育家soah tī 1947年3月11彼工hō͘中國國民黨特務非法掠去 thâi死。
台灣羅馬字協會tī2022年年會通過修改章程，增加每年3月11訂做台灣教師節thang紀念林茂生對台灣教育ê貢獻。發枝台語基金會第一屆董事會mā呼應台羅會主張，kā 311台灣教師節列入基金會捐贈章程，chiâⁿ 做311主張ê第一个基金會。
相關文獻kap活動:
2023年成大台語文師生演行動劇「搶救」林茂生教授雕像(自由時報報導2023.12.29) 公民新聞報導