電子報

張裕宏《中台字詞典》發表koh頒發〈發枝台語薪傳賞〉

Chiúⁿ Ûi-bûn

    張裕宏教授開32冬chiah完成ê《中台字詞典》，2023年12月23 tī國立成功大學台文系館辦理新冊發表。Ūi-tio̍h beh表揚張教授kā伊ê一生奉獻hō͘台灣本土語文ê研究，蔣發太孫玉枝台語文教育基金會特別tiàm新冊發表會這日頒發第一屆〈發枝台語薪傳終身貢獻賞〉hō͘張裕宏教授。因為張裕宏教授人iáu倒tī病床無法度親自出席，由伊ê牽手賴碧蓮女士kap囝兒sī-sè，做伙出席來領賞。受賞典禮吸引百gōa ê關心台灣本土文化ê有志出席觀禮，場面chhiaⁿ-iāⁿ koh hō͘人感動。
 

｢蔣發太孫玉枝台語文教育基金會鄭邦鎮董事kap蔣為文執行長代表頒發第一屆〈發枝台語薪傳終身貢獻賞〉hō͘張裕宏教授：由牽手賴碧蓮女士代表領賞。」

    張裕宏教授khai 32冬ê時間chiah完成編寫《TJ中台字詞典》。Tng張教授準備beh kā《TJ中台字詞典》出版ê時，soah無sè-jī來poa̍h倒，倒病床。可惜張教授目前已經無法度家己翻身kap講話，未來可能無法度koh有任何新ê著作。Poa̍h倒進前，張教授已經有先委託成大台文系蔣為文教授協助出版ê事工，《TJ中台字詞典》chiah thang順利出版koh發表。蔣為文表示，這pái出版ê費用是透過台灣羅馬字協會、台文筆會等社團ê台語有志募資來--ê，非常感謝台語界ê支持chiah會當順利完成。這本字典冊皮kō͘精裝--ê，內頁用聖經紙。除了有中、台對譯ê特點以外，《TJ中台字詞典》ia̍h比《康熙字典》koh-khah豐富，內容大約有六萬詞，kui本冊lóng總有1600頁khah ke。所收ê語詞包括台灣地理、歷史、文化kap台灣人ê視野、現代化ê用語等等，thèng好講是學台語智識ê寶庫，非常適合bat中文、想beh學台語ê少年世代、做台語文化產業、台語傳播業ê人，koh有骨力phah-piàⁿ傳承台語ê少年父母來使用。總講1句，《TJ中台字詞典》是一本會當幫chān台灣人kā母語台語khioh--轉-來非常重要koh實用ê工具冊。這本詞典m̄-nā是張裕宏教授一世人ê學術精華，mā是伊siōng尾beh奉獻hō͘台灣人ê經典大作。

    張裕宏教授是台中大雅人，自細漢chiū對文字符號真有興趣。Teh讀台中一中ê時，chiū bat家己創一套家己chiah看有ê文字家己歡喜。讀東海大學ê時，阿公送伊一本《甘字典》，像tit-tio̍h寶kāng-khoán，chiū開始家己學白話字（POJ），mā啟發伊對「台灣字」研究ê初心。彼時陣，伊tiāⁿ-tú到中文系聽文字學ê課。1962年張裕宏ùi東海大學畢業，先留任做助教，chiap-sòa tī 1965年出國留學。代先tī美國紐約州ê Hamilton College做特別生，修讀語言學ê所有課程。1966年正式進入美國Cornell大學攻讀語言學kap東南亞研究，tī接觸有關文字課題ê時，有真深入ê思考。攻讀期間，1968年hioh熱ê時bat tī學校--ni̍h ê語言學校，擔任廈門話／台語ê助教，1970年到美國Princeton大學Chinese Linguistics Project擔任一年ê研究員，koh趁hioh熱去美國North Dakota 大學協辦的SIL（Summer Institute of Linguistics）擔任講師。SIL International 是非營利ê宗教團體，in到世界各地真chē所在，幫chān在地人用當地ê語言寫出聖經。

    張裕宏tī 1972年提tio̍h Cornell大學語言學ê博士學位，隔tńg tang去新加坡大學教文字學kap聲韻學。1979年joa̍h--人，tī日本國際基督教大學ê暑期語言學校擔任講員，kāng 1年轉來到國立台灣大學外文系教冊，教英文、語言學chit-kóa課程。Tī台大外研所教英國文學8年ê時間，專題是「Chaucer」kap中世紀英國文學。1981年兼任清華大學中語系，教文字學，1989年tī美國西雅圖ê University of Washington做學者合作研究一年。1994年，台大成立語言學研究所，改做台大外文系kap語言所合聘教授。1997年兼任新竹師院台語所ê教授。1998年主張廢除國語政策，實施族群語言教育。 張裕宏教授tī 1990年bat參與發起「台灣語文學會」，期待chhui-sak學術界正式研究台灣語文。伊後來mā參與「台灣羅馬字協會」（2001年成立），繼續發表chē-chē有關台語文ê學術論文kap相關著作。
 

｢張裕宏教授ê牽手賴碧蓮女士出席新冊發表會，現場替買冊ê觀眾簽名。」

    張裕宏tī新加坡大學教冊ê時期，正式行上「文字學」這條路。代先，伊用卡片整理文字，ūi-tio̍h編輯字典1步1步khoaⁿ-khoaⁿ-á收集資料。Tī台語禁忌ê年代，他m̄-bat停止對台語、白話字ê學術研究，一路行來已經超過50 tang。張裕宏為tio̍h証明「台灣話m̄是無文字ê語言」，為tio̍h對「台灣話，台灣字ê使命感」一直teh phah-piàⁿ。張裕宏經典ê著作有2001年《白話字基本論》，chiū是以語言學角度探討白話字ê台語聲韻學kap白話字ê教科書。2004年ùi台大退休liáu後，伊有koh-khah chē ê精神專心kō͘台語寫作。2005年《阿鳳姨ê五度ê空間》是ūi細漢gín-á學台語所寫ê兒童文學（2015出版插繪版續集）。2007年台大語言所kā伊過去ê語言學學術論文精選出版《張裕宏教授論文選集》。2009年《TJ台語白話小詞典》是他開7 tang精心編寫ê作品，收錄大約二萬ê語詞，是了解當代台語siōng kài實用ê參考工具冊之一，bat有已經畢業ê學生去日本大學交流ê時，驚1 tiô講發現in tng teh使用這本字典來學習台灣白話字。除了學術著作，伊ia̍h bat tī西雅圖台灣婦女會、台灣教會等演講有關台語文獻kap台語書寫。2016年接受西雅圖華盛頓大學東亞圖書館ê口述歷史採訪。

    成大台文系教授兼發枝台語基金會執行長蔣為文表示，基金會成立以來已經通過設立幾nā項台語文獎勵辦法，其中包含「全國台語文教學、研究kap創作獎勵辦法」beh來鼓勵全國民眾投入台語文ê教學、研究kap創作。前項獎勵辦法獎勵項目包含〈發枝台語薪傳終身貢獻賞〉、〈發枝台灣語文出版獎助〉、〈林茂生大師講座〉、〈王育德博士講座〉、〈林茂生論文發表賞〉、〈林茂生教授台語教學優良賞〉、〈蔣發太先生台語師培菁英賞〉、〈孫玉枝女士台語認證傳承賞〉、〈陳信從老師玉蘭樹賞〉、〈詹文聲教授國際台語文獎學金〉、〈王育德教授台語文研究賞〉、〈鄭良偉教授台語文研究賞〉、〈巴克禮牧師台語文國際化貢獻賞〉、〈鄭兒玉牧師白話字貢獻賞〉等。因為看tio̍h張裕宏教授對台語ê貢獻，發枝台語基金會決定頒發第一屆發枝台語薪傳終身貢獻賞hō͘伊。這項獎項包括獎牌1面kap十萬kho͘獎金。蔣為文表示，「發枝台語基金會」歡迎社會各界推薦未來ê台語薪傳賞tio̍h主，來表揚長期投入台灣本土語言文化khang-khòe ê台灣人。
 

文章出處：《台灣字雜誌no7》，2024.01，pp26-289，發行單位：台灣羅馬字協會、台文筆會；財團法人高雄市蔣發太孫玉枝台語文教育基金會贊助。